A Coruña.- O delegado territorial da Xunta na Coruña, Ovidio Rodeiro, e o xuíz decano, Luis Pérez Merino, visitaron hoxe as dependencias da antiga Audiencia Provincial, unha vez rematado o traslado das instalacións que ata o de agora estaban situadas no edificio Proa. Logo da inauguración da Fábrica de Tabacos o pasado 31 de marzo, e da mudanza de todas as dependencias concluída a finais de xuño, a nova distribución permite concentrar a actividade xudicial en dependencias propias, xerando un aforro anual en alugueiros de máis de 600.000 euros anuais.
O delegado explicou que no edificio da antiga Audiencia quedan agora emprazadas as salas de vistas e de procuradores; a sala de vistas de instrución nº 8; os locais sindicais, a oficina dedicada ás cláusulas chan; Mercantil 1, 2 e reforzo; os catro xulgados de Contencioso; os xulgados de Primeira Instancia nº 10 e nº 3; e o Instituto de Medicina Legal de Galicia (Imelga). Quedan, así mesmo, máis de 280 metros cadrados dispoñibles para futuras actuacións.
Ovidio Rodeiro lembrou que a Fábrica de Tabacos “supuxo o maior esforzo inversor da Xunta de Galicia nunha sede xudicial” e lembrou que foi posible grazas a un investimento de máis de 16 millóns de euros “nun edificio emblemático restaurado cun coidado e bo gusto excepcionais”. Co remate dos traslado “a Xunta cumpre o compromiso que adoptou desde o principio e executou as obras necesarias, e pactadas con representantes sindicais”, para adecuar as instalacións da Audiencia aos novos usos.
O delegado territorial quixo aproveitar a visita para “agradecer aos funcionarios a súa colaboración e a comprensión polas molestias que causaron as mudanzas”. Rematou asegurando que “o investimento en Xustiza é investimento directo nunha sociedade avanzada, moderna e pensada para os cidadáns do século XXI”. “A Xunta –rematou- sinte unha especial satisfacción polo traballo feito nunha cidade que non merecía menos”.