O Diario Oficial de Galicia
(DOG) publica hoxe unha segunda convocatoria da orde de axudas
destinadas ao fomento da contratación de mulleres que sofren violencia
de xénero nas entidades locais galegas debido ao esgotamento do crédito
de 800.000 euros reservados na primeira convocatoria. Nesta segunda
resolución as axudas contarán cun orzamento de 538.551,68 euros
financiados ao abeiro do Pacto de Estado contra a Violencia de Xénero.
Dado
o volume de solicitudes presentadas e o esgotamento do crédito inicial,
a Secretaría Xeral de Igualdade decidiu ampliar a partida para atender a
este colectivo. Con esta actuación, que supón un importante esforzo
económico, a Xunta reafirma o seu compromiso coas vítimas de violencia
de xénero, ás que lle ofrece os recursos necesarios para contribuír a
que as mulleres acaden unha maior autonomía a través da promoción da súa
independencia económica e do seu empoderamento, e reforzar ao mesmo
tempo as posibilidades dunha posterior inserción laboral estable, co
obxectivo fundamental de lograr a súa plena integración na vida
económica e social.
O obxectivo que se consigue con esta segunda
ampliación é que todas as entidades locais que cumprían os requisitos da
convocatoria publicada no pasado mes de maio poidan beneficiarse destas
axudas para levar a cabo a contratación de vítimas de violencia de
xénero que permitan o seu acceso ao mercado laboral. As axudas
destináranse a financiar a contratación de mulleres que sofren violencia
de xénero, para a realización de obras ou servizos de interese xeral ou
social, ata un máximo de 12 mensualidades, coa finalidade de mellorar a
súa inserción laboral.
Os requisitos para realizar as
contratacións son os mesmos que na primeira orde de axudas publicada en
maio. Os contratos deberán ser para a realización de obras ou servizos
de interese xeral e utilidade social; deben ser executados polas
entidades locais en réxime de administración directa ou polos
organismos, entes ou empresas públicas ás que se encomende a súa
execución; a duración dos contratos será como mínimo de catro meses e
deberá favorecer a formación e a práctica profesional das mulleres
contratadas. Ademais, a entidade local terá que designar unha persoa de
apoio para a traballadora ou traballadoras contratadas que actúe como
profesional de referencia no tempo que dure a contratación e poderá
contar con apoio de persoal técnico da Secretaría Xeral da Igualdade con
formación en xénero.
A presentación das solicitudes realizarase a través do formulario normalizado dispoñible na sede electrónica da Xunta de Galicia.
O prazo de presentación de solicitudes será dun mes, contados desde
mañá, e os contratos que se realicen deberán formalizarse por parte da
entidade beneficiaria antes do 10 de novembro de 2019.