SILLEDA | SEMANA VERDE
Máis de 720 expositores participan na 42 edición da Feira Internacional Abanca Semana Verde de Galicia
Silleda | Máis de 720 expositores participan desde
hoxe na 42 edición da Feira Internacional Abanca Semana Verde de
Galicia, que abriu esta mañá as súas portas. O vicepresidente a
Xunta, Alfonso Rueda; o conselleiro de Cultura e Turismo, Román
Rodríguez; o conselleiro do Medio Rural, José González; e o delegado
territorial da Xunta en Pontevedra, José Manuel Cores Tourís,
participaron na inauguración do evento.
A Feira centrará os seus
dos primeiros días na parte profesional; e a fin de semana nos aspectos
máis lúdicos. Conta con catro salóns paralelos: o Salón de Alimentación
do Atlántico (Salimat Abanca) centrado no sector alimentario; Fecap
Abanca, o único salón galego centrado na caza, pesca e natureza; e
Turexpo Galicia e a Feira de festas de interese turístico, Festur.
Ademais, acollerá actividades relacionadas con moitos outros sectores
como as mascotas, a biomasa, a gandería ou a pequena maquinaria.A
feira, como vén sendo tónica habitual nos últimos anos, volve medrar
con respecto á celebrada en 2018: tanto en número de expositores; como
en superficie expositiva, que chegará nesta edición a case 19.500 metros
cadrados, e en representación internacional.
Na área expositiva o
certame seguirá contando coa participación de importantes grupos
empresariais como El Corte Inglés, Vegalsa-Eroski, Gadisa, Carrefour,
MediaMarkt, Abanca e R. Tamén se incrementa a representación
institucional doutras partes de España que comezou o pasado ano coa
Junta de Andalucía e a Deputación de Burgos, ás que este ano se suman as
Deputacións de Castellón e de Huesca, a Junta de Extremadura, e o
Ministerio de Turismo e Artesanía de Guinea Bissau. Ademais das
actividades profesionais, durante a fin de semana realizaranse outras
máis enfocada ao público xeral, como demostracións de freestyle
motocross, cociña en vivo, ou exhibicións de ximnasia acrobática sobre
cabalos de pura raza galega.
Referente no noroeste peninsular
A
Feira Internacional Abanca Semana Verde tense consolidado como o gran
certame multisectorial de mostras e ocio do noroeste peninsular. Ao
longo destes anos, tal e como destacou o vicepresidente da Xunta, a
Feira apostou por unha mellora continua con maior número de empresas,
máis presenza institucional, unha nutrida participación internacional;
unha maior superficie; e máis actividades con atractivos para todos os
tipos de público. Pola súa banda, o conselleiro do Medio Rural
valorou a importancia deste tipo de feiras na nosa comunidade como
dinamizadores da súa contorna.
A Consellería do Medio Rural
colabora con este evento a través do espazo dedicado ás razas autóctonas
como son as bovinas cachena, caldelá, frieiresa, limiá, vianesa ou
rubia galega, a ovella, a cabra e o cabalo galegos, a galiña de Mos e o
porco celta, ademais de todas as razas caninas propias da nosa
comunidade. Tal e como explicou José González, para dar a coñecer estas
razas, haberá competicións e exhibicións, entre outras actividades. Así
mesmo, a consellería do Medio Rural apoia ás pequenas e medianas
empresas do sector agroalimentario para que poidan estar presentes neste
escaparate. Neste aspecto, o conselleiro destacou que ata 36 empresas
de diferentes sectores produtivos (queixos, xeados, viños, conservas,
repostería...), a maioría acollidas a un indicativo de calidade, estarán
presentes estes días en Silleda con axuda da consellería, que ademais
organizou tamén un posto dedicado á marca de leite Galega 100%.
Neste
sentido, José González agradeceu aos gandeiros e agricultores o seu
traballo diario, tanto ao fronte das súas empresas, como pola súa
presenza en Silleda e aproveitou para reiterar o compromiso da
Consellería para traballar xuntos da man.