GALICIA | ELECCIÓNS 28A
Pontón: "Galicia pode estar con voz propia en Madrid"
Poñerse na pel das miles de mulleres que traballan nas rías galegas
levou a portavoz nacional, Ana Pontón, e a candidata ao Congreso por
Pontevedra, Carme da Silva, a poñerse as botas e compartir tarefa con
mariscadoras na Ría de Arousa.
“Visibilizar o seu traballo e contribuír ao seu recoñecemento
social”, subliñou Pontón, “poñer o noso grao de area neses obxectivos”. O
compromiso dun BNG decisivo en Madrid é defender no Congreso medidas
para mellorar as súas condicións laborais e salariais, a rexeneración
integral das rías e a transferencia da loita contra a contaminación
mariña.
“Son os compromisos do BNG sabendo que podemos ser decisivas tras o
28A e que Galiza pode decantar a política a do Estado collendo a
papeleta dunha BNG que presenta un proxecto sólido, unido coa cabeza e
co corazón neste país e cun obxectivo: traballar por este país dándolle
voz tamén á xente do mar”.
Na recta final de campaña, subliñou Pontón, “o que estamos vendo é
que hai partido, que Galiza pode estar con voz propia en Madrid e que
hai que sumar no BNG os votos de todas as persoas que queren esa voz
propia no Congreso e queren frear a dereita carca, machista e antigalega
á que lle disputamos escanos pola Coruña e Pontevedra”, recalcou.
Por tanto, a líder nacionalista apelou “ás persoas que queren que
Galiza conte pero que tamén están preocupadas por esa dereita extrema.
Non teñen que renunciar a nada porque co voto ao BNG Galiza será
decisiva no Estado e evitaremos que entre esa dereita antigalega e
reaccionaria de Vox e Ciudadanos”. Desde Cambados, no corazón da Ría de Arousa a máis produtiva do
mundo, Pontón reflexionou sobre a capacidade de xerar emprego das rías
galegas que se multiplicaría se estivesen completamente saneadas de
Norte a Sur.
“Coidar as nosas rías significa coidar a biodiversidade e o medio
ambiente pero tamén facer unha aposta pola creación de riqueza e de
emprego. Estanse perdendo moitos postos de traballo porque segue
pendente rexeneración integral das nosas rías”, explicou.
Salarios e pensión dignas
Detrás das mans das mariscadoras que rañan na area sae un produto de
gran valor comercial que debe aportar máis rendas a quen realiza o
traballo directo no mar, “salarios dignos, condicións laborais dignas e
pensións dignas” serán as nosas prioridades”, indicou Pontón ante as
mariscadoras.
Compromisos nos que insistiu Carme da Silva enumerando as principais
propostas que defenderá nun Congreso sen maiorías absolutas: Plan de
rexeneración integral das rías galegas, con fondos tanto do Estado como
da UE e da Xunta, “que poña en valor todo o potencial e riqueza destas
augas, para crear máis emprego e de máis calidade”.
En segundo lugar, a transferencia da competencia en materia contra a
contaminación mariña e máis medios, “que permitan camiñar cara o
obxectivo de vertidos cero”. Mellorar as condicións laborais das
mariscadoras, con medidas como incrementar os redutores da idade de
xubilación e o recoñecemento de enfermidades laborais para as doenzas
máis comúns nestas traballadoras tras unha vida no mar.
Igualmente, Da Silva trasladará ao Congreso propostas que contribúan a
poñer en valor os produtos galegos, con medidas que pasan por “limitar e
controlar a importación de especies foráneas” e por darlle “marca de
calidade a un produto do país que xa ten un gran prestixio” o que,
ademais, redundará nun incremento do valor de mercado que debe
trasladarse ás rendas das mariscadoras. Departamento de comunicación / BNG