Rianxo.- A conselleira do Mar, Rosa Quintana, asistiu hoxe á celebración da VIII Festa do Mexillón en Rianxo, onde destacou a boa calidade desta especie en Galicia. Esta cita gastronómica, organizada polo Club de Remo de Rianxo, ten como obxectivo promocionar o produto das bateas rianxeiras e recadar fondos para o club.
Alí, a titular de Mar fixo fincapé na importante tradición de Galicia no cultivo desta especie. Unha produción que no 2016 acadou os preto de 240.000 toneladas por un valor económico que superou os 109 millóns de euros. Tamén destacou a grande implantación do sector bateeiro na zona do Barbanza e a importancia fundamental da mitilicultura para as rías galegas.