Dircom Galicia visita Sogama

Membros de Dircom Galicia, en Sogama.

Membros de Dircom Galicia, Asociación de Directivos de Comunicación, presidida por Amalia Baltar, desprazáronse hoxe á sede da Sociedade Galega do Medio Ambiente para coñecer de primeira man a actividade desta empresa pública, que xestiona a meirande parte dos residuos urbanos producidos na comunidade, así como os programas de comunicación e educación ambiental nos que vén traballando para que cada vez sexan máis os cidadáns que se conciencien na necesidade de levar a cabo unha xestión máis sostible dos seus refugallos e incrementar desta forma a súa achega á reciclaxe. 

Representantes de Sogama encargáronse de explicar, de forma pormenorizada, o cometido que a entidade está a desenvolver en Galicia, á vez que avanzaron o proxecto de ampliación da súa infraestrutura central, iniciativa que permitirá ampliar a súa capacidade nun 81%, pasando das 550.000 toneladas/ano nominais a 1 millón. Culminadas as obras, en decembro de 2018, Sogama pasará  a ser unha das plantas das súas características máis grandes de Europa e unha das maiores do mundo, erixíndose en todo un referente internacional, á vez que consolidará o seu liderado en España.


En sintonía coa economía circular

Desta forma, procederase á construción dunha nova planta para a clasificación dos envases plásticos e de papel/cartón contidos no lixo en masa, á vez que se remodelará a actual nave de reciclaxe, tratamento e elaboración de combustible, na que xa se viña separando o vidro, o aceiro e o aluminio erróneamente depositados polos cidadáns na bolsa negra. Esta actuación permitirá á empresa aumentar a súa achega ao reciclado en 120.000 toneladas anuais de material, multiplicando por catro as cifras actuais, e diminuír o vertido a valores meramente testemuñais, pretendendo chegar ao vertido técnico cero, é dicir, que só se desviará a vertedoiro aquela parte do lixo que non se poida reciclar nin valorizar material ou enerxeticamente. 

Este proxecto representará un fito no labor da Sociedade e marcará o inicio do camiño que esta se propuxo emprender para cumprir cos canons da economía circular, é dicir, máis reutilización, máis reciclaxe e menos vertido, concibindo aos residuos como recursos. 

Acto seguido, o grupo tivo oportunidade de realizar un percorrido guiado polas instalacións que conforman o complexo medioambiental de Cerceda. Tras unha primeira parada na planta de clasificación, onde se recepcionan os envases de plástico, latas e briks recollidos a través dos contedores amarelos, e sepáranse por tipoloxías para ser remitidos aos centros recicladores, o itinerario seguiu o seu curso pola planta na que se procesa a bolsa negra e na que, tras seleccionar a fracción susceptible de ser reciclada, o resto convértese nun combustible derivado de residuos (CDR) que se valoriza enerxéticamente na planta termoeléctrica para producir enerxía suficiente coa que abastecer unha cidade como Vigo.


Dircom

Creada en 1992, é unha asociación profesional que agrupa a directivos e profesionais da comunicación de empresas, institucións e consultoras de España. A día de hoxe conta con máis de 950 socios, entre eles Sogama, e sete delegacións territoriais, unha en Galicia. 

A entidade vén organizando máis de 100 actividades anuais que se enmarcan nos eixes estratéxicos da entidade, é dicir, recoñecemento, coñecemento, networking e Responsabilidade Social Corporativa. Ademais, a través da Escola Dircom ofrece aos seus socios formación específica en comunicación corporativa. Máis información en www.dircom.org.