EN ALEMAÑA
Turismo de Galicia participará na feira FREE
O turismo da Comunidade galega estará presente
a vindeira semana na feira de turismo FREE, que se celebrará na cidade de
Munich entre os días 22 e 26 de febreiro, onde Turismo de Galicia presentará a
oferta turística galega para o ano 2017, dentro do segundo mercado
internacional máis importante e o terceiro que máis peregrinos achega ao Camiño
de Santiago.
FREE é a feira de turismo con maior
repercusión na rexión de Baviera, o estado federado máis grande de Alemaña. Tratase
dun certame xenérico de turismo, aínda que tamén con pavillóns temáticos dedicados
a caravaning, camping, bicicleta, outdoor, saúde e benestar, deportes
acuáticos, e con activades nas que os visitantes poden participar.
A nosa comunidade esperta moito interese entre
os visitantes que buscan novas ideas para as súas vacacións ou ben para
informarse de primeira man cando xa teñen decidido un destino. Trátase dun
público con cultura viaxeira e bo coñecedor de Galicia, especialmente polo
Camiño de Santiago.
Demanda
turística
Con máis de 163.000 viaxeiros aloxados e preto
de 250.000 pernoitas nos establecementos de Galicia o mercado alemán
representou en 2016 case o 11% do total do turismo internacional. O alemán, foi,
así, o segundo mercado en orde de importancia detrás de Portugal.
O pasado ano, a demanda turística alemá
presentou un incremento que superou o 3,3% a cifra de viaxeiros aloxados
durante 2015 e nun 3,6% o nivel de pernoitas dese ano. O turismo alemán cara a Galicia acumula catro
anos consecutivos de incremento da demanda en Galicia co que en 2016 rexistrou
os seus niveis máximos.
Por outra parte, o ano pasado, 21.333
peregrinos alemáns realizaron o Camiño de Santiago e recibiron a Compostela, o
que supuxo un 11,50% máis que no ano 2015. Deste xeito, Alemaña foi o terceiro
país que máis peregrinos achegou á Ruta Xacobea cunha porcentaxe do 8,60% sobre
o total.