O 24 de outubro celébrase o Día da Biblioteca
e as bibliotecas públicas galegas dependentes da Secretaría Xeral de Cultura da
Consellería de Cultura e Educación desenvolverán ao longo de toda a semana unha
extensa programación dirixida a achegarlle os seus servizos á cidadanía.
Actuacións, obradoiros, xornadas de portas
abertas, contacontos, visitas guiadas, liberación de libros e mostras
bibliográficas son algunhas das propostas que terán lugar ao longo da vindeira
semana na Biblioteca de Galicia, nas bibliotecas públicas de Lugo e de Ourense,
na da Coruña Miguel González Garcés, na de Vigo Juan Compañel, na de Pontevedra
Antonio Odriozola e na de Santiago de Compostela Ánxel Casal. Esta última mesmo
recoñecerá os mellores lectores adultos e infantís coa entrega do premio “Superlectores”,
consistente en lotes de libros para os usuarios con maior número de préstamo.
Teatro e misterios por descubrir en
Santiago de Compostela
Tanto a Biblioteca de Galicia, na Cidade da
Cultura, como a Biblioteca Pública de Santiago Ánxel Casal abrirán as súas
portas o día 24 con visitas guiadas para coñecer mellor o funcionamento das
bibliotecas. Ademais, a Biblioteca Pública de Santiago Ánxel Casal realizará
unha campaña de liberación de libros por diferentes espazos da biblioteca, que
o lector ou lectora poderá levar para liberaralos de novo, unha vez lidos, en
calquera lugar da cidade, contribuíndo así a expandir a lectura máis alá das
paredes da biblioteca.
Neste mesmo centro, pola mañá, haberá unha
sesión de contacontos para bebés (con inscrición previa), “Contos de ida e
volta”, a cargo de Charo Pita. E pola tarde, os cativos e nenas de 6 a 12 anos
(previamente inscritos) terán a misión de descubrir “Quen matou a
bibliotecaria?”, unha actividade para investigar as distintas tarefas que se
realizan nunha biblioteca. Para que os máis pequenos entendan o seu
funcionamento, a Ánxel Casal programou, así mesmo, unha mostra co título
“Historias de biblioteca”, unha selección de libros infantís nos que son
protagonistas as bibliotecas e o persoal bibliotecario. Na mesma semana, tamén
dirixido ao público infantil, o día 26 Títeres Cachirulo representará ás 18:30
h. “O libro da Selva”, no salón de actos, con entrada libre ata completar a
capacidade.
Co obxectivo de estimular que o pracer pola
lectura entre polos ollos, o día 24 a biblioteca arranca o seu V Concurso de
Fotografía “Lendo en Compostela”, con imaxes que suxiran interese polos libros
e a lectura na cidade.
Contos e maxia nas bibliotecas da Coruña e
Lugo
A Biblioteca Pública da Coruña Miguel González
Garcés viaxa “Alla scoperta della Sicilia” cun curso para afondar na lingua
italiana e na cultura da illa mediterránea, que se prolongará ata o mes de
novembro. Os interesados deben inscribirse no web da biblioteca. Este mesmo
procedemento é o que se require para participar no taller de teatro programado
para maiores de 18 anos, baseado na obra “Noite de reis” de William
Shakespeare. No final da semana, o sábado 29 de outubro, este centro tamén
ofrece, ás 12:00 h. da mañá con entrada libre, a sesión “Contos revoltos”
relatados por Fátima Fernández, dentro da programación Ler conta moito.
Os contos tamén serán protagonistas do Día da
Biblioteca o propio día 24 na Biblioteca Pública de Lugo, que programa ás 18:00
h. a sesión “Conto de outono: a nena do farol”, que require inscrición previa.
Pola tarde, e dentro do programa “Filosofía nas bibliotecas” organizado pola
Fundación Euseino, Brais Arribas impartirá unha charla sobre “Deixar ser a
diferenza: a potencia política da identidade feble”. Durante todo o día, as
persoas que se acheguen á biblioteca poderán levar de balde un libro e un
marcapáxinas co lema “Anímate a ler!”. E para pechar a semana dunha maneira
máxica, o venres 28 o salón de actos acollerá o espectáculo para todos os
públicos “Onde está o mago Antón?”, ás 18:00 h., con entrada libre ata
completar a capacidade. Ducias de xogos de maxia para animar a cidadanía a
achegarse á biblioteca e descubrir, na visita, os fondos antigos da biblioteca,
incunables e manuscritos históricos, que estarán expostos ao longo de toda a
semana baixo o título “Os tesouros bibliográficos da Biblioteca Pública de
Lugo”.
Receitas personalizadas
A Biblioteca Pública de Ourense instalará o
día 24 na rúa do Paseo unha carpa para difundir os seus servizos e promover a
incorporación de novos usuarios. O persoal técnico da biblioteca tamén
realizará, ao longo de todo o día, “Consultorios literarios”, nos que ofrecerán
receitas personalizadas para cada persoa en función do seu perfil lector. Pola
tarde, ás 18:30 h. haberá unha visita especial, da man da “fada da biblioteca”,
para que nenos e nenas se acheguen aos libros que atesoura.
O mesmo día, na Biblioteca Pública de
Pontevedra Antonio Odriozola, Trinketrinke Teatro ofrecerá a sesión de
contacontos “Paxariños”, para a rapazada a partir de 3 anos, con entrada de
balde ata completar a capacidade. Con cada préstamo efectuado ese día, grandes
e pequenos levarán de agasallo un marcapáxinas. Será unha boa oportunidade para
achegarse á biblioteca, que ao longo da semana, tamén destaca unha selección de
libros no centro de interese “Os ratos contan... historias de bibliotecas”.
Outra mostra bibliográfica curiosa é a que
programa, durante toda a vindeira semana, con motivo do Día da Biblioteca, a
Biblioteca Pública de Vigo Juan Compañel. Baixo o título “Bibliotecas arredor
do mundo” selecciona, para público xeral, un conxunto de títulos sobre as
bibliotecas máis curiosas e importantes do planeta. A programación da semana
rematará o día 27 cunha sesión de contacontos e cancións para os máis cativos
(menores de 3 anos) a cargo de Soledad Felloza.
Toda a programación no móbil, coa app
Axenda Cultura
Para facilitar o acceso permanente a toda a
programación das bibliotecas públicas e dos centros de programación cultural
dependentes da Consellería de Cultura e Educación, a Xunta de Galicia conta coa
app Axenda Cultura, dispoñible gratuitamente en Google Play e App Store desde www.xunta.gal/aplicacions-mobiles