Sogama adxudica a Fergo Galicia a construción dunha planta de compostaxe industrial
Sogama adxudicou á compañía galega Fergo Galicia, por un importe de 2.403.400 euros, a construción e posta en marcha dunha planta de compostaxe industrial que a entidade ubicará nas dependencias do vertedoiro de residuos non perigosos de Areosa a fin de tratar na mesma a materia orgánica proveniente de grandes produtores asentados nas proximidades da localidade coruñesa de Cerceda (mercados, centros comerciais, restaurantes, hospitais, etc). O fin último é fabricar un compost de calidade que poida ser utilizado posteriormente no ámbito agrícola como fertilizante natural e sen restricións.
Ademais, co obxectivo de promover a máxima recuperación dos materiais contidos no lixo, no caso daqueles que non sirvan para compostar, pero si para reciclar, como é o caso dos metais e os plásticos, serán clasificados previamente para remitilos á industria transformadora, garantindo así a súa posterior conversión en novos produtos.
A pretensión última desta infraestrutura, que se enmarca no Plan Galego de Xestión de Residuos Urbanos 2010-2020, é conseguir a maior valorización posible dos residuos, a través da compostaxe e o reciclado, e minimizar as cantidades de rexeitamentos producidos. Cunha capacidade para 15.000 toneladas anuais, as obras da instalación darán comezo a finais do próximo mes de agosto, prevendo que estea plenamente operativa en xuño de 2017.
Proceso técnico
Separados os elementos susceptibles de ser reciclados, nunha primeira fase a materia orgánica introdúcese en pilas pechadas con inxeccións de aire durante un período de entre 6 e 8 semanas a fin de que esta fermente e comece a transformarse en “compost primario”. Posteriormente, trasládase a outras pilas diferentes con volteo e axitación de aire, introducíndose así na fase de maduración, que dura entre 6 e 10 semanas, dependendo de factores tales como a temperatura e o grao de humidade.
O circuíto conclúe co afine final, onde se retiran as partículas pesadas e outros elementos impropios, acondicionando tres tipos de material: o rexeitamento, que non é compost, e que se valorizará material e/ou enerxeticamente; un compost de nivel 1, que é o groso; e un compost de nivel óptimo, que é o fino, utilizando ambos como enmenda orgánica a aplicar nos solos para aportarlles nutrientes e mellorar a súa estrutura.
Estímase unha produción final de 3.000/4.000 toneladas de compost ao ano. Non obstante, para que o produto final cumpra coas especificacións técnicas establecidas e poida ser aplicado con garantías, faise necesario que haxa previamente unha correcta selección dos residuos orgánicos en orixe. Departamento de comunciación