O secretario xeral do PSdeG-PSOE, Gonzalo Caballero, apuntou hoxe que
as eleccións do próximo 10 de novembro decidiranse “en clave de
proxecto de futuro”. Logo do anuncio da convocatoria
electoral, dixo que “España e Galicia seguen necesitando o proxecto de
futuro e de avance dos socialistas fronte ás tres dereitas” na “sorte de
segunda volta electoral” á que “estamos abocados polo bloqueo político”
contra quen gañou as eleccións de abril.
O líder dos
socialistas galegos defendeu o proxecto e o “modelo de avance social”
que representa Pedro Sánchez “fronte ao retroceso que buscan as tres
dereitas” e que necesita do apoio social e político en outubro. Este
proxecto, dixo, está “comprometido co avance social e económico, cos
sectores desfavorecidos, coa igualdade de mulleres e homes, cos parados
de longa duración ou coas pensións, a sanidade e a educación públicas”.
Caballero
remarcou que as próximas eleccións celebraranse “en clave de futuro” e
“referendarán a posición maioritaria e os avances sociais fronte á
ultradereita” co apoio aos socialistas e á proposta de goberno “moderado
e progresista”. Replicou así que os augurios da “dereita e
ultradereita” fronte a “quen ía trocear España ou pactar cos
independentistas” demostráronse “falaces, viñéronse abaixo”.
Chamou
ao apoio da esquerda e tamén do electorado de centro e moderado que
queren “impoñer unha maioría social e de progreso fronte aos acordos de
Casado, Álvarez de Toledo e Abascal”, que “non ofrecen nada positivo
para os galegos e as galegas”.
O responsable socialista
sinalou que a convocatoria “non era o escenario que a cidadanía estaba
esperando nin o que nos queríamos”, pero si ao que “estamos abocados”
logo do “bloqueo político” contra a investidura de Pedro Sánchez, que
foi o claro vencedor da pasadas eleccións, sen posibilidades de goberno
para ningunha outra opción.
BNG
Doutra banda, a portavoz nacional, Ana Pontón,
considera que o fracaso na formación do goberno do Estado constata a “inutilidade
e a incompetencia das forzas estatais”, cuxos dirixentes deixaron claro que os
personalismos e as estratexias partidistas están por riba do interese xeral.
“Sánchez, Casado, Iglesias e Rivera demostraron que lles importa un pito os
problemas da cidadanía e que lles importa un pito Galiza, catro anos con catro
eleccións fronte a catro líderes máis preocupados polos seus egos que polos
asuntos da cidadanía”, sintetizou Pontón, que se pregunta con que cara van
volver pedir a confianza dos e das electoras.
“Sorprende que os que nestes meses demostraron o seu fracaso e a súa
incompetencia agora pretenden volver pedirlle o voto a cidadanía, pregúntome
para que, é o primeiro que deberían explicar”, subliña. A líder nacionalista está convencida de que a maioría social “vai darlle a
volta a tortilla” e converter o problema creado polas forzas estatais nunha “oportunidade”
da man dun BNG que é o único que garante a defensa de Galiza no Estado.
“O 10N van recibir nas urnas o que se merecen porque a maioría da cidadanía
galega tomou nota da inutilidade das forzas estatais e estou convencida de que
os galegos e as galegas imos darlle a volta a tortilla e converter o problema
que eles crearon nunha oportunidade para que Galiza teña voz, teña peso e
acabemos co ninguneo, coa discriminación e mesmo diría co desprezo que
demostraron a este país”, argumentou.
“E van converter ese problema nunha oportunidade da man dunha forza política
como o BNG, que garante a defensa de Galiza ante Madrid e que garante tamén
seriedade na política, algo que bota de menos a maioría social, porque no Bloque
estamos para dar solucións mentres as forzas estatais demostraron formar parte
do problema. Sánchez, Casado, Iglesias e Rivera, máis preocupados por si mesmos que por estar
á altura, van ter a resposta que merecen nas urnas”, declarou.
Pontón subliñou que o BNG está “preparado” e vai ir “a por todas” para
converter o 10N nunha oportunidade de colocar Galiza no lugar que lle
corresponde dentro da axenda do Estado, e para que no Congreso volva haber unha
forza política que dea voz os problemas e os intereses dos e das galegas.
En relación a intención de Feixóo de non presentar un proxecto de
orzamentos para 2020, Pontón lembra que estamos na mesma situación que con
Raxoi cando forzou unha repetición dos comicios xerais, e nesa ocasión non
dubidou en elaborar as contas públicas.
“Pregúntome porqué Feijóo quere ser un elemento máis de inestabilidade
cando pode facer un orzamento e pode realizar unha modificación de ser necesaria,
como xa fixo no presente exercicio. Por tanto, se ameza con non presentar
orzamentos é para facer dano a Galiza dentro da súa estratexia partidista e
electoralista. Senón os presenta e porque é un irresponsable”, sentenciou. Departamento de comunicación / PSdeG / BNG