COMPOSTELA MONUMENTAL
Medio Ambiente e Compostela Monumental repartirán máis de 50.000 bolsas ecolóxicas entre os comerciantes do casco histórico
SANTIAGO DE COMPOSTELA | A Consellería de Medio Ambiente,
Territorio e Vivenda e a Asociación de Comerciantes Compostela
Monumental repartirán máis de 50.000 bolsas de material ecolóxico entre
200 establecementos comerciais da zona monumental no marco dunha campaña
máis ampla que, baixo o lema Recicla, reduce, reutiliza. Eu merco no casco histórico de Santiago, pretende sensibilizar e concienciar sobre o uso dos plásticos e as prácticas de consumo responsables.
Durante
a presentación desta iniciativa, a conselleira de Medio Ambiente,
Territorio e Vivenda, Ángeles Vázquez, salientou a importancia dunha
medida que incide directamente nun sector tan importante coma o
comercial e coa que se persegue un dobre obxectivo. Por unha banda,
sensibilizar e avanzar nunha cada vez maior conciencia social, que
aposte pola reutilización de materiais e a redución dos plásticos, e por
outra, promocionar unha imaxe dun casco histórico sustentable no que se
fomenta e aposta polas prácticas de consumo respectuosas co medio
ambiente.
Nesta liña, a conselleira lembrou que o consumo actual
de plástico nas súas diferentes formas está a producir uns niveis de
residuos dispersos moi elevados, que provocan contaminación e supoñen
unha ameaza para os ecosistemas acuáticos. Por iso, a normativa tanto
europea como estatal avanza cara ao obxectivo de reducir progresivamente
o consumo de bolsas non biodegradables, de xeito que en 2025 cada
persoa debería utilizar, como máximo, 40 bolsas de plástico lixeiro ao
ano.
Na mesma dirección vai tamén a futura Lei de Residuos e Solos
Contaminados de Galicia, que será remitida este ano ao Parlamento para a
súa aprobación e que ten entre os seus obxectivos intensificar a loita
contra os plásticos, con medidas novidosas como a prohibición da venda
de vaixelas dun só uso, salvo que na súa composición haxa máis dun 50%
de material biodegradable.
Concursos de deseño de bolsas de tea
O
obxectivo da Xunta con iniciativas coma esta na que colabora con
Compostela Monumental, segundo explicou a conselleira, pasa por sumar
esforzos e fomentar a implicación do maior número de colectivos sociais
posible na redución do consumo de plástico en xeral e das bolsas feitas
deste material en particular, incidindo en que “a prevención é a mellor
forma de xestión de residuos” que existe.
De feito, a Consellería
de Medio Ambiente lanzou este mesmo ano unha campaña similar dirixida ao
sector comercial galego. Baixo o lema Menos bolsas, máis vida,
Vázquez Mejuto explicou que o seu departamento lanzou dous concursos de
deseño paralelos co fin de escoller a imaxe que se estamparía en 18.000
bolsas de tea reutilizables (3.000 bolsas de merenda e outras 15.000 de
diferentes tamaños) e repartilas de forma gratuíta entre
establecementos comerciais e alumnos de centros escolares de toda
Galicia.