Un total de 8.315 persoas teñen formalizado a súa inscrición no
Rexistro Galego de Instrucións Previas (datos desde a entrada en
funcionamento en marzo de 2008 ata finais de decembro do pasado). Delas,
o 63% son mulleres e o 37% son homes. Por medio do documento de
instrucións previas, unha persoa maior de idade, capaz e libre,
manifesta anticipadamente a súa vontade, coa fin de que esta se cumpra
no momento en que chegue a situacións nas que non sexa quen de expresala
persoalmente, sobre os coidados e o tratamento da súa saúde ou, unha
vez chegado o falecemento, sobre o destino do seu corpo ou dos seus
órganos.
A idade media dos outorgantes é de 58 anos. No referido
ao contido do documento, practicamente a totalidade dos asinantes (máis
do 99%) fan mención expresa sobre os coidado e o tratamento da súa
saúde. O 47% mostrouse ademais favorable á doazón de órganos e tecidos e
o 6% manifestou a súa intención de doar o seu corpo.
Por
provincias, o 48% das persoas anotadas concéntrase na Coruña, seguida
por Pontevedra co 32%, Lugo co 11% e Ourense co 9%. Por grupos de idade,
o 36% das persoas que deciden inscribirse no Rexistro de Instrucións
Previas teñen máis de 65 anos, o 34% sitúanse na franxa de idade de
entre os 51 e os 64 anos, o 25% entre os 31 e os 50, e o 5% entre os 18 e
os 30 anos.
Observando a formalización do documento, do total dos
8.315 cidadáns inscritos, o 45% formalizou o documento ante testemuñas,
o 26% das persoas formalizaron ante notario, e o 29% ante un
funcionario habilitado. Esta última opción está dispoñible dende xaneiro
de 2015.
Procedemento de inscrición
As solicitudes de inscrición poden presentarse a través da sede electrónica da Xunta de Galicia; en calquera rexistro autonómico ou estatal; nos servizos centrais da Consellería de Sanidade en Santiago e en calquera das unidades do Rexistro galego de instrucións previas. Toda
persoa que o desexe pode dirixirse, ben de forma presencial ou
telefónica, a calquera destas unidades, onde se lle proporcionará a
información e axuda necesaria, tanto na elaboración do documento como
nos trámites para a súa inscrición.
Tamén se poderá depositar o
documento nos rexistros oficiais ou mesmo nos centros do Servizo Galego
de Saúde, que darán traslado para a súa tramitación no Rexistro Galego. O documento de instrucións previas deberá estar formalizado ante tres
testemuñas maiores de idade con plena capacidade de obrar, das que
dúas, como mínimo, non poderán ter relación de parentesco ata o segundo
grao por consanguinidade ou afinidade, nin estar vinculadas por relación
patrimonial, coa persoa outorgante. Tamén se poderá formalizar ante
notario ou ante un funcionario do propio Rexistro Galego de Instrucións
Previas ou dunha das súas unidades, sen necesidade da presenza de
testemuñas.
Consulta na historia clínica electrónica
Os
profesionais sanitarios poden consultar o documento de instrucións
previas rexistrado a través da Historia Clínica Electrónica, para que
sexa tido en conta naquelas circunstancias nas que sexa preciso. Así
mesmo, o Rexistro Galego de Instrucións Previas sobre Coidados e
Tratamento da Saúde está integrado no Rexistro Nacional para, deste
xeito, contribuír a asegurar a eficacia deste dereito en todo o Estado.
Polo tanto, as instrucións previas, con independencia da Comunidade
Autónoma, poden ser coñecidas polos profesionais sanitarios aos que nese
momento corresponda a responsabilidade da prestación da asistencia
sanitaria.
Entre as funcións do Rexistro Galego están a de
inscribir os documentos de instrucións previas, así como a súa
substitución ou revogación, que se pode facer en calquera momento.
Ademais de facilitar o coñecemento da existencia e o contido dos
documentos inscritos aos profesionais responsables da asistencia
sanitaria, custodian os mesmos.