A Coruña | O pleno da Deputación da Coruña aprobou unha moción que compromete o
apoio á folga feminista do vindeiro 8 de marzo. A iniciativa contou cos votos a
favor do PSdG-PSOE, BNG, Compostela Aberta, Marea Atlántica e Alternativa dos
Veciños. O PP presentou unha moción respecto ao 8 de marzo que tamén prosperou.
A Deputación da Coruña apoiará a folga feminista do
8 de marzo e facilitará os medios dispoñíbeis para a realización e difusión de
eventos, manifestacións, reivindicación e actos convocados polas asociacións e
colectivos de mulleres co obxecto da folga, convidando o conxunto da sociedade
a apoiar e unirse ás mobilizacións convocadas. Así se recolle na moción
aprobada cos votos de todos os grupos presentes no pleno, agás o PP, na que a
institución tamén se compromete a adoptar as medidas necesarias para garantir o
exercicio do dereito de folga por parte das traballadoras da Deputación que se
sumen á reivindicación. A fachada do edificio institucional iluminarase tamén
como acto simbólico de apoio á folga.
A moción
contempla tamén o "de acadar que a perspectiva de xénero se teña en conta
na elaboración de todos os programas e plans aprobados pola institución,
partindo dos datos da diagnose de igualdade que se veu facendo nestes meses e
das medidas concretas que este traballo recolle".
Finalmente, a iniciativa compromete á Deputación a
elaborar un Plan de Formación específico no relativo á igualdade de xénero
dirixido ao persoal e orientado a incrementar a súa implicación e capacidades
nos diferentes niveis da administración.
Outra moción foi aprobada unicamente cos votos do PP
cun texto que compromete á Deputación a instar ao Goberno do Estado e á Xunta a
cumprir e implementar medidas de cara á igualdade.
300.000 euros para programas de igualdade das asociacións
Un total de 300.000 euros é o orzamento que a área de
Igualdade e Servizos Sociais destina ao programa de subvencións a entidades sen
ánimo de lucro para o mantemento de políticas de igualdade entre homes e
mulleres e loita contra a violencia de xénero.
O prazo para presentarse á convocatoria, que saíu
publicada este mesmo venres no BOP, finalizará ás 14:00 horas do día 21 de
marzo e as asociacións poderán recibir axudas de entre os 1.000 € até os 40.000 euros.
A responsábel da área de Benestar Social, Educación
e Políticas de Igualdade, Ánxela Franco, destacou que "con estas axudas a
Deputación pretende contribuír dun xeito directo e eficaz na loita contra a
violencia machista" e tamén "apoiar o necesario avance cara unha
igualdade real e efectiva na que se teñen que implicar as institucións e a
sociedade enteira". Departamento de comunicación