O presidente do Partido Popular de
Galicia, Núñez Feijóo, subliñou esta mañá que os populares galegos
ofrecen o seu modelo de organización de amplo espectro como exemplo e
alternativa única ao socialismo, o populismo e o independentismo que hoxe goberna
en España e que “só pensa en continuar no Goberno”. “Fronte a un PSOE que cada
día se fai máis pequeno, no PP debemos facer máis amplas as nosas bases”,
apuntou, para insistir en que na formación caben moitas sensibilidades
diferentes.
Feijóo apuntou que esta Convención
Nacional serviu para corroborar que o PP é “un proxecto de presente para lanzar
o futuro e acreditar que somos un punto de encontro para moita xente”. “Non
presumimos de ter un pensamento único, senón de poñer o noso pensamento a disposición
dos demais”, recalcou.
Ao remate do evento, o líder popular
reivindicou ao seu partido como unha formación na que “non se esquece a
ninguén, senón que sabemos que somos unha suma de todos os que nos precederon”,
gabando as intervencións dos expresidentes Mariano Rajoy e José María Aznar,
así coma do presidente Pablo Casado. “Marchamos de aquí
tranquilos e satisfeitos, porque sabemos que podemos seguir sendo útiles á
maioría social coa que soñaba Manuel Fraga”, sentenciou. Departamento de comunicación