A Coruña.- A
Deputación da Coruña publica hoxe no Boletín Oficial da Provincia a listaxe das
92 pemes que manteñen este ano as axudas do Plan de Emprego Local (PEL) para a
contratación de persoal.
Cun
importante esforzo inversor de 676.281,08
euros, a Deputación
facilita que 92 empresas coruñesas con sede en municipios de menos de 20.000
habitantes que xa obtiveron axudas na convocatoria de 2017 para a contratación
de novos/as traballadores/as podan seguir contando con eles/as durante un ano
máis.
Neste segundo ano, a Deputación
subvenciona o 50% dos custes laborais destes traballadores (durante o primero
ano, o PEL subvenciona o 75% do salario do traballador).
Esta liña verase complementada nas
vindeiras semanas coa concesión das novas axudas 2018 de PEL-PEMES, cun
orzamento de 2,4 millóns de euros, coa que o Goberno provincial espera apoiar a
unhas 200 pemes coruñesas na contratación de novos traballadores.
“Trátase dunha aposta pola
estabilidade no emprego”, afirmou o presidente da institución provincial,
Valentín González Formoso, que lembrou que este ano por primeira vez as
empresas beneficiarias do programa PEL-PEMES dispoñen dunha liña específica
para poder manter no seu cadro de persoal aos traballadores contratados na
anterior convocatoria.
“A idea é crear emprego estable, de
calidade. Permitir que as persoas que comezaron a traballar grazas a este
programa podan seguir facéndoo de xeito e que as contratacións non se limiten a
periodos de un ano”, apuntou González Formoso, que subliñou que o 50% das
contratacións realizadas ao abeiro do PEL son xa de carácter indefinido e que
as tres liñas do Plan (PEL-PEMES, PEL-EMPRENDE e PEL-CONCELLOS) supoñen a
creación de máis de 1.000 empregos cada ano na provincia da Coruña.
Catro
de cada dez empresas que contrataron co PEL manteñen aos traballadores
Estas 92 renovacións de contrato
representan arredor dun 41% das 224 que a liña PEL-PEMES favoreceu o ano
pasado, o que supón que catro de cada dez empresas que en 2017 obtiveron axudas
do PEL para a contratación de persoal optaron por renovar as axudas para seguir
contando con estes traballadores.
Os concellos con maior número de
solicitudes presentadas en concedidas nesta convocatoria foron Ordes (7
traballadores), As Pontes (6), Curtis (6), Mazaricos (6), Zas (5) e Boiro (4).
Por comarcas, as máis beneficiadas son
as de Betanzos (16 concedidas por importe de 107.833,70 €), Ordes (14
concedidas por un total de 100.110,64 €), Eume (8 concedidas por 70.004,59 €) e
Barbanza e Terra de Soneira, con 8 subvencións concedidas por importe de 63.000
e 57.757 euros, respectivamente.
Atendendo ao tipo de negocio, a
maioría de beneficiarios (63%) son pequenas pemes con menos de 10
traballadores. Os empresarios individuais (autónomos) representan un 34% das
solicitudes concedidas, mentres que o 3% restante son pemes con máis de dez
traballadores.
As empresas beneficiarias abranguen un
amplo abano de actividades, destacando ás vinculadas á agricultura e gandería
(26%), sector servizos (44%) e pequeno comercio (12%). A listaxe completa