GALICIA | POLÍTICA
Gonzalo Caballero: "O PP e Feijóo enganaron a Galicia"
O secretario xeral do PSdeG, Gonzalo Caballero, mantivo
este luns un encontro coa nova subdelegada do goberno en Pontevedra, Maica
Larriba, para abordar “a nova etapa” que se abre con Pedro Sánchez na Moncloa.
O seu goberno, dixo, “está devolvendo a esperanza e a ilusión na política a
milleiros de cidadáns”.
E, dado que o ascenso ao goberno de Pedro Sánchez se
ten producido hai apenas “cinco semanas”, Gonzalo Caballero amosou a súa
“incredulidade” ao ver agora ao PP “reclamar todo o que non fixo e sobre o que
Feijóo calou cando non se cumprían os compromisos con Galicia”.
Nese senso, o máximo dirixente do PSdeG subliñou que
“Feijóo foi o perfecto cómplice de Rajoy cando deixou de gastar en Galicia
2.000 millóns que estaban orzamentados”; na “inauguración fraudulenta da ponte
de Rande”, que aínda onte rexistraba “retencións quilométricas” mentres se
manteñen varios carrís pechados ao tráfico; ou no “novo engano” relativo á
retirada da peaxe de Redondela.
“O PP e Feijóo enganaron a Galicia, e cremos que é
surrealista que quen foi cómplice desas fraudes intente reclamar agora”,
sentenciou Gonzalo Caballero, quen atribuíu estas intervencións de Feijóo a que
“ten perdido o rumbo” despois do seu intento de desembarcar en Madrid e de
“errar” no candidato que apoiou nas primarias do PP.
Pola súa banda, o secretario xeral dos socialistas
galegos sostivo que “non hai unha soa decisión” tomada polo novo goberno “que
poida atrasar ni un só segundo a chegada do AVE a Galicia”. Tanto é así,
proseguiu, que o ministro de Fomento xa trasladou a ADIF, dirixido por unha
galega, que “todo o previsto se faga con celeridade”. “Nos dedicaremos a facer
ben o que Rajoy e Feijóo fixeron mal”, concluíu.
"Exemplaridade"
E, tras soster que o novo goberno “é crible nos seus
compromisos”, tamén puxo o foco en que se distingue do anterior na súa aposta
pola “dignidade e exemplaridade na acción pública”.
Ao fío disto, o líder do PSdeG sinalou a Feijóo que
ten na votación que mañá terá lugar no Parlamento sobre a continuidade da
valedora unha ocasión “óptima para amosar o seu compromiso coa limpeza e o seu
respecto ás decisións xudiciais”.
“O PP non foi capaz de recoñecer a importancia da
Gürtel e, agora, se se quere rexenerar, ten que empezar a tomar medidas claras
de loita contra a corrupción e a prol da exemplaridade”, recalcou Gonzalo
Caballero.
"Colaboración"
En canto á visita a Pontevedra do secretario xeral,
a nova subdelegada do goberno, Maica Larriba, agradeceu ante os medios “a
visita dun compañeiro e amigo” con quen “vai continuar a colaboración” xa
existente entre ambos.
“Colaboración nesta nova andaina que iniciamos entre
todos, para facer chegar a todas as provincias os obxectivos e os compromisos
do goberno de Pedro Sánchez”, subliñou Larriba. Departamento de comunicación