O secretario xeral do PPdeG, Miguel Tellado, declarou
que a actual situación do goberno da Deputación de Lugo é a constatación da
descomposición do partido socialista na provincia, estando ante o final do
“besteirismo”. Para o número dous dos populares galegos, “nada disto tería
pasado se se deixase gobernar a quen gañou as eleccións que foi o PP”.
“Non precisamos criticar a ninguén porque os maiores descalificativos xa
os teñen cruzados o presidente e o vicepresidente da Deputación que eran do
mesmo partido”, recordou Tellado nunha entrevista na Radio Galega, onde tamén
lamentou a intranquilidade que isto xera nos cidadáns, que agardan dos
políticos máis rigor e responsabilidade.
Ademais, dixo que esperan que os resultados das próximas eleccións
municipais poidan acabar con esta etapa de “clientelismo político” onde as
axudas da Deputación se dan aos concellos en función do partido que os goberne.
Pola contra, puxo en valor o labor realizado por Elena Candia, malia que fose
durante un curto espazo de tempo: “Gobernou para todos e traballou para o
interese xeral da provincia”, un modelo ao que considera que debemos regresar,
moi lonxe do actual que tanto dana a imaxe xeral da política.
Un proxecto fracasado
Por outra parte, apuntou que a situación de crise
interna que vive En Marea é permanente, polo que non é necesario que os
populares critiquen a Luis Villares xa que diso xa se encarga Carmen Santos a
diario.
Tellado insistiu en que Villares “cada día que
pasa perde máis peso político no seo da súa formación”. Segundo alertou, as
Mareas viven unha deriva negativa que deteriorará aínda máis a situación das
cidades nas que gobernan xa que “son un proxecto fracasado que non ten que ver
coa Galicia real”.
Así mesmo, Tellado lembrou que a autoridade do portavoz parlamentario de
En Marea quedou totalmente dinamitada tralo lamentable capítulo que
protagonizou a súa deputada Paula Quinteiro, que se negou a dimitir a pesar da
petición pública de Villares e mesmo de Beiras. “Estamos ante a crónica dun
grupo mixto anunciado”, apuntou xa que, malia que non se sabe quen marchará, “a
convivencia dentro de En Marea é bastante complicada”.
Deste xeito, o número dous do PPdeG afeou que os que se presentaban as
eleccións como a alternativa están hoxe divididos pedindo dimisións de forma
cruzada. “Eran o cambio a peor”, sostivo
mentres manifestaba que Podemos ten máis diverxencias que confluencias.
Ser alternativa crible e viable
Coa vista posta nas vindeiras elección
municipais, Tellado recoñeceu que quedan 14 meses nos que traballarán para acertar
cos equipos e para elaborar proxectos. Cuestionado sobre quen serán os
candidatos do PP nas urbes, admitiu que a insistencia neste pregunta “revela
que hai unha grande preocupación social por facer que esas cidades que hoxe se atopan
nunha situación de parálise poidan sumarse á situación de recuperación
económica que está vivindo Galicia no seu conxunto”.
Segundo salientou, “hai moitas ganas de cambio nas cidades nas que
gobernan as Mareas, o PSOE e o BNG e apostaremos por ser a alternativa crible e
viable”, para o que seguirán traballando desde a humildade e escoitando sempre
á xente.