GALICIA
Feijóo destaca a importancia de coñocer a Galicia que fomos para entender a Galicia que somos
.jpg&x=305)
Vilagarcía de Arousa.- O presidente do Goberno galego, Núñez
Feijóo, destacou hoxe, na presentación da novela Volveré a buscarte de Pilar Cernuda, a importancia de coñecer a
Galicia que fomos para entender a Galicia que somos.
“Nestes tempos nos cales moitos tratan de
reescribir a historia, ter unha idea certeira do que fomos é máis importante
que nunca”, aseverou, subliñando que nesta obra, ademais da historia dos
protagonistas está escrita tamén gran parte da nosa historia colectiva, da nosa
identidade.
Durante a presentación, o responsable do
Executivo autonómico afirmou que o lector ten entre as páxinas deste libro a
crónica novelada de todo un século, o relato dun país no que a necesidade e o
illamento non foron impedimento para saír adiante.
Sobre este punto, lembrou que a emigración
forma parte indisoluble do século XX en Galicia; “e gran parte do interese
desta obra radica en que repara en todas as súas arestas”, dixo, incidindo en
que en todo ese proceso que marcou as xeracións dos nosos devanceiros, Pilar
artellou o retrato dos que marcharon, pero tamén dos que quedaron.
Así mesmo, aseverou que no seu libro, quen o
descoñeza comprenderá un pouco mellor o carácter aberto que temos os galegos.
“Non en van, o esforzo de aqueles galegos permitiu ir tecendo unha relación con
outros pobos que hoxe conservamos e da que somos depositarios orgullosos”,
dixo.
O presidente do Goberno galego quixo concluír
a súa intervención cunhas palabras de afecto para os familiares e amigos de
José González, “galego querido a ambos os lados do mar, cuxa recente morte nos
consternou a todos”, sentenciou.