A Coruña.- O investigador da Universidade
da Coruña Juan Manuel Bermúdez García vén de recibir o Premio
ao Mellor Artigo publicado por un investigador novo outorgado polo
Grupo Especializado en Química do Estado Sólido da Real Sociedad Española de
Química. O artigo, que foi publicado en Nature Communications “Giant barocaloric effect in
the ferroic organic-inorganic hybrid perovskite under easily
accessible pressures” explica o descubrimento dos
investigadores Juan
M. Bermúdez García, Manuel
Sánchez Andújar e Socorro Castro García, do grupo Química
Molecular e de Materiais, QUIMOLMAT, da Facultade de Ciencias, con sede no
Centro de Investigación Científicas Avanzadas (CICA), e Jorge López Beceiro e
Ramón Artiaga, do grupo de investigación Propiedades térmicas e reolóxicas dos
materiais, PROTERM, da Escola Politécnica Superior, xunto coa catedrática María
Antonia Señarís Rodríguez, do grupo QUILMOMAT e directora do traballo, dun novo
material para a refrixeración menos contaminante e máis barato.
Os científicos coruñeses propoñen o
uso de materiais calóricos como alternativa aos gases de refrixeración,
perigosos e contaminantes. A proposta, barata e non contaminante, permitirá
facer sistemas de refrixeración máis compactos e eficientes, moi útiles nos
dispositivos electrónicos. O traballo foi distinguido tamén co Premio de
Investigación Ernesto Viéitez da Real Academia Galega de Ciencias en 2017.
Bermúdez
impartiu unha charla divulgativa sobre a súa investigación no evento TEDxGalicia , que vén ademais de editar o
vídeo da súa intervención.
O famoso artigo
xurdiu da tese de doutoramento de Bermúdez García na que estaba a investigar
novos materiais orgánicos-inorgánicos para aplicacións tecnolóxicas,
enerxéticas e medioambientais. Deste xeito, o grupo descubriu que o material do
artigo é un sólido cun efecto calórico moi prometedor para refrixeración
inducido por baixas presións. Este é o primeir exemplo dun material sólido
orgánico-inorgánico con efectos barocalóricos. Ademais é a primeira vez que se
reduce enormemente a presión necesaria para exercer un efecto de refrixeración
nun sólido. Ata agora todos os materiais sólidos de refrixeración necesitaban
presións de traballo por riba de 1.000 bar (unhas 1.000 veces superior á
presión atmosférica) e por primeira vez conseguiuse reducir esa presión por
debaixo dos 70 bar, achegándonos á presión que poden acadar os compresores das
neveiras actuais.
Este material
pertence á familia das perovskitas híbridas (materiais emerxentes que teñen
unha gran versatilidade estrutural e un gran número de aplicacións, como por
exemplo materiais fotovoltáicos). Por iso, este grupo de investigación da UDC
decidiu acuñar o termo “perovskiña”
en honor á orixe galega do descubrimento, que xa se está usando pola comunidade
científica. Departamento de comunicación