GALICIA | TURISMO

O turismo de Galicia preséntase en Francia

A cidade de París acolle desde o xoves a 43ª edición do certame Salon Mondial du Tourisme e Turismo de Galicia participa por terceiro ano consecutivo para promover a oferta turística galega e as principais novidades do destino para o ano 2018 no quinto mercado emisor máis importante para a Comunidade.

O Salón Mondial du Tourisme de París celébrase entre os días 15 e 18 de marzo no recinto Parc des expositions Porte de Versailles e nos últimos anos tense convertido nun dos principais certames turísticos de Francia, canto á afluencia de público e concorrencia de operadores turísticos.

Así, Turismo de Galicia participa nesta feira cun recinto dentro do apartado dedicado a España desde o que difunde os valores turísticos da Comunidade e mantén diferentes reunións cos axentes de viaxes deste importante mercado emisor. Ao longo deste ano 2018, Turismo de Galicia ten previsto realizar outras acción de promoción turística no mercado francés, pero xa dun xeito específico para promover o turismo de negocios e o turismo náutico.


Demanda turística francesa

Con algo máis de 111.000 viaxeiros aloxados e preto de 200.000 noites nos establecementos regrados de Galicia, o mercado francés representou en 2017 o 7,5% do total internacional. Francia situouse en cuarto lugar en orde de importancia por detrás de Portugal, Alemaña, Italia e Estados Unidos. Polo que respecta ao Camiño de Santiago, o pasado ano, 8.846 franceses recibiron a Compostela, o que sitúa a Francia como o quinto país estranxeiro con más peregrinos.