GALICIA | UNIVERSIDADE
UDC e a Fundación Alcoa, coa educación para a sustentabilidade
A Coruña.- O
reitor da Universidade da Coruña, Julio Abalde, e o director de Alcoa A Coruña,
José-Gil Fernández Pulpeiro, o vicerreitor de Economía, Infraestruturas e
Sustentabilidade, Domingo Calvo, e o adxunto para Sustentabilidade, Manuel
Soto, presentaron hoxe o proxecto “Educando para a sustentabilidade” na
Sala de Prensa da Reitoría ante un auditorio de profesorado, estudantado,
persoal de administración e servizos e xornalistas.
O proxecto consiste no curso universitario “Campus, casa, cidade:
laboratorios do cambio”, de carácter eminentemente práctico no que o alumnado
recibirá as competencias básicas relacionadas coa sustentabilidade ambiental,
económica e social e realizará actividades cunha marcada acción social, no contorno
inmediato, desde o campus e o fogar até a cidade. As actividades inclúen o
cálculo da pegada ecolóxica, da auga e de residuos, mapas de ruído, avaliación
da contaminación lumínica, do consumo de auga e enerxía, e xestión de residuos
no centro universitario e na casa.
O
reitor agradeceu a presenza de todos os colectivos xa que “éste é un proxecto
integrador para toda a comunidade universitaria”. Abalde alertou da
responsabilidade que ten a universidade cun papel non só formativo senón como
axente exemplarizante para a sociedade. Dentro desta función encádrase o
proxecto que se presentou hoxe que non sería factible se non contase co soporte
da Fundación Alcoa, segundo dixo o reitor e aproveitou para agradecer ao
director da factoría coruñesa o seu apoio a esta iniciativa. Abalde animou a
traballar para facer unha sociedade máis sustentable e enmarcou este proxecto
dentro dunha das liñas de especialización nas que está a traballar a UDC, o
Campus de Sustentabilidade, co aque se pretende que a Universidade da Coruña
sexa un referente a nivel nacional e internacional.
Pola
súa banda, o director de Alcoa Coruña reafirmou o compromiso da súa empresa
polo desenvolvemento sustentable. “Alcoa é unha multinacional con máis de 125
anos e sabe que o futuro vai da man da responsabilidade social e da
sustentabilidade”, manifestou. Fernández Pulpeiro considerou moi importante
formar estudantes e xerar conciencia ambiental na sociedade porque temos un
compromiso de transcedencia ambiental.
O vicerreitor de Economía, Infraestruturas e Sustentabilidade
valorou a educación como unha ferramenta fundamental para afrontar o reto da
sustentabilidade e asegurou que “o cambio ecolóxico virá polos futuros
titulados universitarios”. Domingo Calvo explicou que o proxecto que a UDC presentou
á Fundación Alcoa foi seleccionado e valorado na sede central da empresa en
Estados Unidos que considerou de interese apoialo.
A fábrica de Alcoa na Coruña apoia esta
iniciativa da Universidade da Coruña co soporte financeiro de Fundación Alcoa,
que inviste nas comunidades en que a compañía está presente en colaboración con
institucións e organizacións para aportar melloras principalmente nas áreas de
educación e sustentabilidade ambiental.
Manuel Soto, adxunto de Sustentabilidade e
director da Oficina de Medio Ambiente na UDC, explicou o programa do proxecto
que inclúe conferencias, obradoiros e outras actividades de traballo de campo
que teñen como obxectivo formar nos conceptos básicos de sustentabilidade. Soto
lembrou que a pegada ecolóxica, un dos temas nos que se vai incidir especialmente
no proxecto, no caso de Galicia está en 6,3 hectáreas per
cápita, mentres que a da UDC se sitúa en 33 quilómetros cadrados de bosque que
se necesitaría para absorber o consumo universitario. Declarou o forte compromiso
da UDC coa sustentabilidade que fai que ocupe o cuarto posto nacional no
ránking Green Metric que mide a sustentabilidade universitaria, e o 86 no
mundo. Ver programación