Patrocinado por Hotel Crunia.- Despois de rematar un 2017 histórico, o turismo comeza o ano en Galicia
cos mellores datos da última década. O sector mellorou en todas as variables segundo
amosan os primeiros datos de 2018 publicados hoxe polo Instituto Nacional de
Estatística (INE). Estes confirman que a Comunidade afianza o seu proceso de
desestacionalización, cunha suba do 5,4% na cifra de noites hoteleiras, ata
preto das 300.000, e do 1,4% na de viaxeiros aloxados, os mellores datos da
última década.
É o cuarto ano consecutivo no que os turistas medran en xaneiro en
Galicia e, ademais, permaneceron máis tempo na Comunidade, pois a estadía media
subiu un 4% mentres que no conxunto do Estado descendeu un 1,6%, consolidando a
converxencia coa media. De igual maneira, a ocupación aumentou en xaneiro 1,84
puntos porcentuais e, no caso das fins de semana, este crecemento foi aínda
máis intenso, cun aumento de 2,75 puntos.
O turismo internacional acadou o seu peso máis elevado no primeiro mes
do ano grazas a unha subida do 9,3% da demanda hoteleira, referendada cunha
alza do 4,8% nos viaxeiros. Pola súa banda, o turista nacional, que medrou un
4,5%, realizou un 11% máis de noites.
As tarifas hoteleiras e os niveis de rendibilidade do sector (medidos a
través do RevPAR, o ingreso medio por habitación dispoñible) tamén evolucionaron
positivamente nese período.
Diálogo e traballo co sector
Os datos confirman unha vez máis que a liña de traballo seguida polo
sector privado e a Administración autonómica está a dar os seus froitos. A
piques de cumprir o seu primeiro ano de aplicación, a Estratexia do turismo de
Galicia 2020 segue acadando obxectivos e avanzando en distintos eidos, como
expuxo a pasada semana Nava Castro, directora de Turismo de Galicia, nunha
comparecencia a petición propia no Parlamento de Galicia.
Precisamente o mes de xaneiro marcou o punto de partida da programación
turística para este 2018, coa presentación na Feira Internacional de Turismo
Fitur dos novos produtos e iniciativas impulsados pola Xunta. Entre eles,
destacan Escenarios ao volante, Club da auga, Ruta dos faros ou Galicia
Surfing, que apostan por un turismo sustentable e de calidade que busca
revalorizar e aproveitar os mellores recursos do seu patrimonio natural e
cultural.