Pontevedra.- A
presidenta da Deputación de Pontevedra, Carmela Silva, xunto
ao deputado de Innovación e Promoción Económica, Javier Dios, presentou hoxe a alcaldesas e alcaldes e persoal técnico dos concellos da provincia os
servizos tecnolóxicos que vai poñer en marcha, presta e ofrece a institución
provincial aos municipios. No acto estaban presentes a alcaldesa de Moaña e os
alcaldes de Barro, A Cañiza, Cuntis, A Guarda, A Illa de Arousa, A Lama,
Mondariz, As Neves, Poio, Pontecesures, Portas e Soutomaior; así como
representantes do goberno e persoal técnico de todos os concellos da provincia.
Carmela Silva comezou a súa intervención
recordando que coa aprobación da Lei 39/2015 os concellos están obrigados a
unha serie de cuestións relacionadas coas novas tecnoloxías. Ao respecto, Silva
declarou que “se están a aprobar leis, como a 39/2015, que non incorporan
recursos para a súa aplicación e, sen embargo, son de obrigado cumprimento.
Esta situación está a provocar que os concellos teñan que retraer recursos
doutros servizos para poder cumprir coa lexislación e evitar sancións por
incumprimento, algo que estamos a denunciar e así o fixemos xa na reunión
celebrada o pasado martes da Comisión de Deputacións da FEMP. Non podemos
seguir así, non se poden seguir aprobando leis que non traen consigo recursos
para o seu cumprimento”.
Ante esta situación, tal e como informou a
presidenta da Deputación de Pontevedra, “estamos a impulsar unha estratexia
global de solucións tecnolóxicas aos concellos co obxectivo de contribuír a que
aborden con éxito a súa transformación dixital”. Deste xeito, o primeiro
proxecto que puxo en marcha a institución provincial foi o da administración
electrónica, de xeito gratuíto para os concellos, ao que se adheriron 54
concellos e 2 entidades menores. A través deste proxecto, segundo indicou
Carmela Silva, “xa formamos a 2.218 persoas que traballan na administración
local e a 732 que ocupan cargos públicos; tamén se tramitaron preto de 200.000
expedientes de xeito electrónico, con medias mensuais de 12.000 novos
expedientes electrónicos, 250.000 documentos asinados de xeito electrónico e
35.000 anotacións en rexistro”.
Sobre a administración electrónica
recordou Silva que “somos a provincia que nestes momentos ten instaurada a
administración electrónica en máis concellos e con mellores resultados, algo
que non poderíamos facer sen a implicación e compromiso dos alcaldes e
alcaldesas da provincia e técnicos e técnicos dos concellos que fixeron un
enorme esforzo para facelo realidade”. Neste eido, amais, a presidenta da
Deputación de Pontevedra adiantou que “imos poñer en marcha un plan de mellora
continua no servizo de administración electrónica que nos permitirá contribuír
á xestión do cambio mediante 199 sesións formativas presenciais nos concellos
que permitirán asesoralos e apoialos, unha vez máis, na adaptación ás obrigas
da Lei 39/2015”.
Xunto ao proxecto da administración
electrónica, a presidenta da Deputación de Pontevedra presentou tamén o
novidoso servizo de Padrón Municipal de Habitantes que arrancou hoxe. Este
servizo pretende solucionar os problemas existentes nos concellos na
actualidade que veñen dende a heteroxeneidade das solucións implantadas para
xestionar o padrón, ata solucións desfasadas con mantementos incorrectos e que
non se atopan integradas coa administración electrónica. “Por estes motivos
–subliñou Silva- destinamos máis de 500.000 € a este novo servizo, gratuíto
para os concellos, que implantará a empresa Aytos, e que permitirá migrar os
datos existentes nas aplicacións actuais de cada concello así como integralo na
plataforma de administración electrónica, facilitando a xestión de expedientes
e a realización de trámites municipais, evitando colas e desprazamentos”.
O servizo de padrón, que se ofertará a
través dunha nube privada, inclúe tamén formación en cada concello e mantemento
correctivo e evolutivo, co obxectivo de garantir a corrección de incidencias e
a actualización e inclusión de novas funcionalidades.
A presidenta da Deputación de Pontevedra
tamén deu a coñecer o novidoso servizo de impresión de dixitalización para
entidades locais que “permite regular as condicións e os prezos destes servizos
para as entidades da provincia”.
O servizo será implantado por Canon e hai xa,
nestes momentos, preto dunha vintena de concellos que solicitaron a súa
adhesión ao proxecto.
O servizo de impresión e dixitalización
nace dun estudio previo realizado pola institución provincial que puxo de
manifesto que o parque de sistemas de impresión é heteroxéneo, qque o custe das
copias e o mantemento é elevado, que as entidades locais contan con equipos de
prestacións inadecuadas para as súas necesidades e que existe unha falta xeral
de acordos definidos de maneira contractual que aseguren uns tempos axeitados
de reparación e subministracións de consumibles. “Deste xeito –asegurou Silva-
decidimos impulsar este servizo, pioneiro en España, aberto a todas as
entidades locais da provincia que parte dun modelo de aluguer máis prezo por
copia e que permite aos concellos elixir o número e tipo de equipos que precisa
en función das súas necesidades”.
Mediante o servizo de impresión e
dixitalización, tal e como informou a presidenta da Deputación, “obtemos
condicións máis favorables e custes máis competitivos, facilitamos a xestión
administrativa dos contratos e unificamos o parque de equipos de acordo ás
necesidades de cada entidade. De feito, pódolles dicir que os prezos que
conseguimos son os máis baixos de practicamente todo o Estado”.
Xunto á administración electrónica, o
padrón municipal e o novo servizo de impresión e dixitalización, Carmela Silva
tamén adiantou aos alcaldes e alcaldesas dos concellos da provincia,
representantes dos gobernos municipais e técnicos e técnicas, os novos servizos
e proxectos de futuro da Deputación de Pontevedra en materia de novas
tecnoloxías. Ao respecto, Silva destacou que “neste primeiro semestre de 2018
imos licitar publicamente o servizo de backup na nube tanto para a propia
Deputación como para os concellos, amais de que ao longo do ano imos poñer en
marcha un servizo de CAU (Centro de Atención a persoas Usuarias), un aplicativo
de contabilidade, así como mercar de xeito conxunto licenzas de software tanto
para sistemas operativos como para paquetes ofimáticos”.
Deste xeito, informou Silva, cumpriremos co novo obxectivo “de converter á
provincia de Pontevedra na máis innovadora, moderna e tecnolóxica de todo o
Estado”. Departamento de comunicación