GALICIA

A Xunta lanza a iniciativa "Acendámo-la luz"

Amparo González.

A directora xeral de Familia, Infancia e Dinamización Demográfica da Xunta de Galicia, Amparo González, presentou hoxe no Museo Pedagóxico de Galicia (Mupega) a iniciativa ‘Acendámo-la luz’. Trátase da continuación da campaña ‘37mil sorriSOS’ posta en marcha pola Consellería de Política Social o pasado mes de maio co obxectivo de previr e detectar os abusos sexuais a menores, así como que aqueles que foron vítimas poidan superar esta traumática experiencia.

Amparo González explicou que se a primeira parte da campaña estaba enfocada aos colectivos e profesionais que traballan coa infancia, esta segunda está más orientada ao conxunto da sociedade, “convencidos de que só ela é quen de poñer freo aos abusos”, apuntou. A proposta ten un carácter eminentemente dixital, xa que o que se procura é difundir a mensaxe #acendamolaLuz a través das redes sociais –fundamentalmente facebook, instagram e whatsapp-, ademais de habilitarse a páxina web www.acendamolaluz.com. Nesta dirección de internet, xunto cos contidos da campaña, pódese escoitar a canción do mesmo título que concentra a mensaxe da campaña.

A imaxe da iniciativa é unha árbore de Nadal con doce lámpadas no que dúas delas non alumean, representando así os doce meses do ano e o feito de que un de cada cinco menores podería ser vítima de abusos segundo as estatísticas do Consello de Europa. “Durante os próximos doce meses traballaremos sen descanso para que o vindeiro Nadal todas as lámpadas da nosa árbore alumeen”, explicou a responsable autonómica de Familia; ao tempo que engadiu que esta campaña “é unha invitación colectiva para conseguir que entre todos acendámo-la luz de todas esas pequenas lámpadas que un día se apagaron”.

A través da campaña ‘37mil sorriSOS’ e coa mensaxe ‘Acendámo-la Luz’ a Consellería de Política Social procura alertar dos abusos a menores á sociedade civil, aos medios de comunicación e a todas aquelas entidades ou profesionais que traballan pola infancia, coa finalidade de combater estas situacións. Así, entre os principais destinatarios desta iniciativa están os pais e nais, e os profesionais dos ámbitos educativo e sanitario, posto que eles adoitan ser os primeiros que detectan posibles casos de abusos.

Ao abeiro da campaña, a Consellería de Política Social creou o protocolo de INO, baseado en catro liñas fundamentais: previr, observar, manter a calma e moverse notificando e avaliando cada caso de abuso da man dun profesional especializado. Así mesmo, e en base a este protocolo, elaborouse un conto titulado ‘Ino e o ladrón de sorrisos’ dirixido aos nenos e nenas no que o protagonista chamado Inocencio ou Inocencia relata á súa nai unha serie de situacións relacionadas co abuso.

Ademais, a campaña tamén se fixo visible co espectáculo teatral ‘Pum,pum!’, da compañía Baobab Teatro, que fala de historias cotiás que lles pasan aos menores pero que tamén transmite a mensaxe de que ninguén pode obrigalo a facer cousas que non queren. Este espectáculo dirixido aos escolares está a percorrer as principais cidades galegas.

Finalmente, cómpre lembrar que a Xunta de Galicia dispón dun servizo telefónico de atención ao menor de carácter gratuíto e que funciona todo o ano as 24 horas do día. Trátase do 116 111, atendido por profesionais e ao que poden dirixirse tanto aqueles nenos ou nenas que nalgún momento se sintan maltratados por outra persoa, precisen axuda ou simplemente queiran falar do que lles preocupa; como aquelas persoas que saiban ou sospeiten que algún menor poida estar sendo vítima de violencia ou non estar sendo correctamente atendido.